Հայաստանն ու Հունգարիան ստորագրել են տնտեսական համագործակցության համաձայնագիր
ԵՐԵՎԱՆ, 6 մայիսի․/ԱՌԿԱ/․ Բուդապեշտում տեղի է ունեցել Հայաստանի և Հունգարիայի ԱԳ նախարարներ Արարատ Միրզոյանի և Պետեր Սիյարտոյի ընդլայնված կազմով հանդիպումը։
Օրակարգում եմ ինչպես երկկողմ, այնպես էլ ԵՄ հարթակում համագործակցության հարցեր, տարածաշրջանային թեմաներ։
Հանդիպումից հետո Արարատ Միրզոյանը և Պետեր Սիյարտոն ստորագրել են Հայաստանի Հանրապետության կառավարության և Հունգարիայի կառավարության միջև տնտեսական համագործակցության մասին համաձայնագիր, Հայաստանի Հանրապետության արտաքին գործերի նախարարության և Հունգարիայի արտաքին գործերի և առևտրի նախարարության միջև 2024-2025թթ. համագործակցության ծրագիր։
Հայ-հունգարական հարաբերությունների մասին
2012 թվականին Հայաստանը խզեց դիվանագիտական հարաբերությունները Հունգարիայի հետ, որոնք հաստատվել էին 1992 թվականին, երբ երկիրը հայ սպա Գուրգեն Մարգարյանի սպանության համար Հունգարիայում ցմահ ազատազրկման դատապարտված և հայրենիքում ներում շնորհված Ռամիլ Սաֆարովին արտահանձնեց Ադրբեջանին։
2022 թվականի դեկտեմբերի 1-ին Հայաստանի և Հունգարիայի արտաքին գործերի նախարարները պայմանավորվեցին վերականգնել դիվանագիտական հարաբերությունները։ 2023 թվականի մայիսին՝ 11 տարվա դիվանագիտական հարաբերությունների բացակայությունից հետո, երկրները նշանակեցին ոչ ռեզիդենտ դեսպաններ՝ Հայաստանում Հունգարիայի դեսպանը դարձավ Աննա Մարիա Շիկոն (նստավայրը՝ Թբիլիսի), իսկ Աշոտ Սմբատյանը նշանակվեց Հունգարիայում ՀՀ դեսպան (համատեղության կարգով՝ Վրաստանում ՀՀ դեսպան, նստավայրը՝ Թբիլիսի)։
