Երևանի բյուջեի եկամուտների մասով կատարողականը 9 ամսում կազմել է 94.3%, չի հավաքվել 3.7 մլրդ դրամ
ԵՐԵՎԱՆ, 20 հոկտեմբերի․/ԱՌԿԱ/․ 2025 թվականի հունվար–սեպտեմբերին Երևանի բյուջեի նախատեսված 65.5 միլիարդ դրամ եկամուտներից փաստացի հավաքվել է 61.8 միլիարդ դրամը։ Այս մասին նշել է Երևանի քաղաքապետարանի եկամուտների հաշվառման և գանձման վարչության պետի պարտականությունները կատարող Դավիթ Հակոբյանը։
«Կատարողականը կազմել է 94.3%, չի հավաքվել 3.7 միլիարդ դրամ, իսկ սեփական եկամուտների աճը, նախորդ տարվա նույն ժամանակահատվածի համեմատ, կազմել է ավելի քան 15 միլիարդ դրամ», - նշել է նա երկուշաբթի քաղաքապետարանում կայացած խորհրդակցության ժամանակ։
Ըստ Հակոբյանի, թերակատարման հիմնական պատճառը տրանսպորտային վճարներից ստացված եկամուտների անբավարար հավաքագրումն է։
Երևանի քաղաքապետ Տիգրան Ավինյանը հանձնարարել է վարչական շրջանների ղեկավարներին ակտիվացնել աշխատանքը՝ հաշվի առնելով, որ տարին ավարտվում է։
