Հայաստանի բյուջեի հավելուրդը 5 ամսում կազմել է ՀՆԱ-ի 0,8%-ը. ՀԲ

ԵՐԵՎԱՆ, 21 հուլիսի․/ԱՌԿԱ/․ Հայաստանի պետական բյուջեի հավելուրդը 2026 թ.-ի հունվար–մայիսի արդյունքներով կազմել է գնահատված տարեկան ՀՆԱ-ի 0,8%-ը, այնինչ ամբողջ տարվա համար ծրագրված էր ՀՆԱ-ի շուրջ 4,3%-ի չափով պակասուրդ։ Այս մասին ասվում է Համաշխարհային բանկի «Armenia Monthly Economic Update – July 2026» ամենամսյա ամփոփագրում։

Ընդ որում, ըստ փաստաթղթի, անմիջապես մայիսին գրանցվել է բյուջեի պակասուրդ՝ կանխատեսվող տարեկան ՀՆԱ-ի 0,2%-ի չափով։

«Մայիսին հարկային մուտքերն աճել են 15,3%-ով՝ 2025 թվականի նույն ժամանակահատվածի համեմատ։ Հիմնական նպաստումն ունեցել են ֆիզիկական անձանց եկամտային հարկից մուտքերը, որոնք տարեկան կտրվածքով ավելացել են 22,5%-ով»,- նշում են ՀԲ փորձագետները։

Համաշխարհային բանկում այս աճը կապում են աշխատողների թվի 4% ավելացման և միջին անվանական աշխատավարձի 10,8% բարձրացման հետ։

Ավելացված արժեքի հարկից մուտքերն աճել են 14,6%-ով՝ տարեկան կտրվածքով, ինչը, ըստ ամփոփագրի, արտացոլում է բարձր տնտեսական ակտիվությունը և հարկային վարչարարության շարունակական բարելավման արդյունքները:

«Պետական բյուջեի ընդհանուր ծախսերը մայիսին նվազել են 6,1%-ով՝ անցյալ տարվա մայիսի համեմատ։ Սա պայմանավորված էր կապիտալ ծախսերի 54,5% կրճատմամբ՝ պաշտպանության ոլորտի ծախսերի դադարեցման հետևանքով, քանի որ 2026 թ.-ի համար ծրագրված էր ավելի ցածր պաշտպանական բյուջե»,- ասվում է ամփոփագրում։

Միևնույն ժամանակ նշվում է, որ ընթացիկ ծախսերն ավելացել են 17,3%-ով՝ տարեկան կտրվածքով, հիմնականում սոցիալական ծախսերի 27,5% աճի հաշվին։

Ինչպես նշվում է ամփոփագրում, սոցիալական ծախսերի ավելացումը մեծապես կապված է 2026 թ.-ի հունվարից գործող համընդհանուր առողջապահական ապահովագրության համակարգի ներդրման հետ։

«Դրա շրջանակում պետությունն ամբողջությամբ ֆինանսավորում է երեխաների, տարեցների և բնակչության խոցելի խմբերի ապահովագրավճարները։ Դրա հետևանքով, առողջապահության ծախսերն ըստ ֆունկցիոնալ դասակարգման աճել են 75,9%-ով՝ տարեկան կտրվածքով»,- նշվում է հետազոտության մեջ։