Կառավարությունը հավանություն տվեց ԵՄ-ին ՀՀ-ի անդամակցության գործընթացի մեկնարկի մասին նախաձեռնությանը
ԵՐԵՎԱՆ, 9 հունվարի․/ԱՌԿԱ/․ ՀՀ կառավարությունը հինգշաբթի նիստի ժամանակ դրական դիրքորոշում հայտնեց ԵՄ-ին ՀՀ-ի անդամակցության գործընթացի մեկնարկի մասին քաղաքացիական նախաձեռնությանը, որը հավաքել էր 50 հազար ստորագրություն։
ՀՀ ԱԳ նախարար Արարատ Միրզոյանը ներկայացրեց օրինագիծը և հիշեցրեց, որ վերջին տարիներին ՀՀ-ն և ԵՄ-ն բավականին ինտենսիվ և դինամիկ հարաբերություններ են ունեցել, այդ հարաբերություններն ունեցել են շատ հարուստ բովանդակություն, նաև ընդգրկել են տարբեր ոլորտներ:
ՀՀ վարչապետ Նիկոլ Փաշինյանն իր հերթին նշեց, որ ԵՄ անդամակցելու որոշումը չի կարող կայացվել օրենքի կամ կառավարության որոշման մակարդակով, այլ բացառապես հանրաքվեի միջոցով, ինչպես սահմանում է Հայաստանի Սահմանադրությունը։
Փաշինյանը նաև նշեց, որ օրենքի ընդունումից հետո Հայաստանի և Եվրամիության միջև պետք է քննարկում լինի ճանապարհային քարտեզի մշակման շուրջ, որը կներառի թե՛ ԵՄ-ի, թե՛ Հայաստանի տեսլականը։
«Իմ ընկալմամբ՝ մինչև ճանապարհային քարտեզի ստեղծման շուրջ բանակցությունների մեկնարկը Հայաստանի Հանրապետությունը գոնե այս պահին որևէ գործողություն չունի անելու։ Սա ասում եմ հանրության շրջանում ակնկալիքները ճիշտ ձևակերպելու համար», – ասաց Փաշինյանը։
