«Քաղաքացիական պայմանագիր»–ն արտահերթ նիստին չի մասնակցելու, որովհետև ընդդիմության օրակարգը կեղծ է․ խմբակցության քարտուղար
ԵՐԵՎԱՆ, 17 հունիսի․/ԱՌԿԱ/․ «Քաղաքացիական պայմանագիր» խմբակցությունը չի մասնակցելու հունիսի 17-ին օրենքի ուժով գումարվելիք ԱԺ արտահերթ նիստին։
«Արմենպրես»-ի հետ զրույցում այս մասին հայտնել է «Քաղաքացիական պայմանագիր» խմբակցության քարտուղար Արթուր Հովհաննիսյանը։
««Քաղաքացիական պայմանագիր» խմբակցությունը արտահերթ նիստին չի մասնակցելու, որովհետև ընդդիմության օրակարգը կեղծ է և չի համապատասխանում Հայաստանի Հանրապետության պետական շահերից բխող օրակարգերին։ Իսկ արտահերթ նիստն առանց մեր մասնակցության չի կարող կայանալ։ Այն օրենքի ուժով կգումարվի, բայց քվորումի բացակայության պատճառով չի կայանա»,- ասաց Հովհաննիսյանը։
Ընդդիմադիր «Հայաստան» և «Պատիվ ունեմ» խմբակցությունների նախաձեռնությամբ այսօր՝ հունիսի 17-ին, ժամը 18.30-ին պետք է գումարվի ԱԺ արտահերթ նիստ։ Օրակարգում գործող կառավարության հրաժարականն ու նորի ձեւավորումն է։
