ԱԳ փոխնախարար․ ԵՄ-ին անդամակցելու օրենքը չի նախատեսում կոնկրետ գործողություններ պարունակող օպերատիվ մաս
ԵՐԵՎԱՆ, 3 մարտի․/ԱՌԿԱ/․ ԵՄ-ին անդամակցելու մասին օրենքի իրականացումը չի նախատեսում կոնկրետ գործողություններ պարունակող օպերատիվ մաս, այն ավելի շատ քաղաքական ուղերձ է, հայտարարել է ՀՀ ԱԳ փոխնախարար Պարույր Հովհաննիսյանն այսօր ԱԺ եվրոպական ինտեգրման հարցերի հանձնաժողովի նիստի ժամանակ։
Նախարարի տեղակալը ԵՄ-ի հետ գործունեության համատեքստում իրականացվող ծրագրերի մասով կոնկրետ գործողությունների առումով նշեց, որ ավարտին է հասնում նոր օրակարգի փաստաթուղթը, որը ոչ միայն լրացնում է CEPA-ն (ՀՀ–ԵՄ համապարփակ և ընդլայնված գործընկերության համաձայնագիր, խմբ․), այլ ընդլայնում է ԵՄ-ի հետ ոլորտները։
«Այս փաստաթուղթը ԵՄ-ի հետ նորացված հարաբերությունների ուղեցույցն է լինելու։ Այն քաղաքական փաստաթուղթ է, բայց ունի իրականացման շատ կոնկրետ գործողություններ բոլոր ոլորտներում։ Չկա մեկ որլորտ, որն ընդգրկված չէ փաստաթղթում»,- ասաց Հովհաննիսյանը։
Նա նշեց, որ ուժեղացնելով CEPA-ի իրականացման գործընթացը՝ հնարավոր կլինի նոր մակարդակ ապահովել ապագա գործողություններում։
