ՀՀ կառավարությունը կդիտարկի Արցախի ճանաչման նախագիծը
ԵՐԵՎԱՆ, 3 մայիսի. /ԱՌԿԱ/. Հայաստանի կառավարությունն իր հերթական նիստի օրակարգում ընդգրկել է Լեռնային Ղարաբաղի Հանրապետության ճանաչման մասին օրենքի նախագիծը։
Մայիսի 5–ին կայանալիք նիստի օրակարգը տեղակայված է կառավարության պաշտոնական կայքում։ Օրինագծի հեղինակներն են` պատգամավորներ Զարուհի Փոստանջյանը և Հայաստանի նախկին վարչապետ Հրանտ Բագրատյանը։
Օրինագծի համաձայն, Հայաստանի Հանրապետությունը ճանաչում է Արցախի Հանրապետությունը։ Իսկ հենց օրենքն ուժի մեջ է մտնում պաշտոնական հրապարակման հաջորդ օրը։ Հարցը կներկայացնի Հայաստանի արտաքին գործերի նախարար Էդվարդ Նալբանդյանը։
Կառավարությունը պետք է ներկայացնի օրենքի եզրակացությունը և ուղղի այն Ազգային ժողով օրենքով սահմանված կարգով։
Օրինագծի հեղինակները նշում են, որ դրա ընդունումը Հայաստանի և Արցախի ներկայացուցիչների միջև կայացած քննարկումների արդյունք է և պայմանավորված է հետագա գործընթացներով, այդ թվում` արտաքին գործոններով։ -0-
