Կբարելավվի անօթևաններին և հաշմանդամություն ունեցող անձանց տրվող աջակցությունը. նախագիծ
ԵՐԵՎԱՆ, 1 հուլիսի․/ԱՌԿԱ/. ԱԺ աշխատանքի և սոցիալական հարցերի մշտական հանձնաժողովը հուլիսի 1-ի արտահերթ նիստում դրական եզրակացություն է տվել«Սոցիալական աջակցության մասին» օրենքում փոփոխությունների փաթեթին:
Ըստ կարգավորումների՝ կհստակեցվեն «անօթևան», «կենցաղավարման օգնություն» հասկացությունները, կսահմանվի նոր ծառայություն՝ անկախ կյանքի ծառայություն՝ հաշմանդամություն ունեցող անձանց համար:
Կհստակեցվեն նաև սոցիալական աջակցության տրամադրման կարգն այն իրավիճակների համար, երբ արձագանքը հրատապ է և հայտնի չէ՝ անձը ՀՀ քաղաքացիություն, բնակության իրավունք կամ ՀՀ-ում գտնվելու այլ իրավունք ունի, թե ոչ:
Նման արտակարգ իրավիճակներում հրատապ արձագանքելու հնարավորությունը կսահմանվի կառավարության որոշմամբ:
Օրենսդրական փաթեթով ամբողջությամբ կփոփոխվի նաև խնամքի հոդվածը:
Փաթեթը նախատեսվում է քննարկել հուլիսի 2-ին գումարվելիք ԱԺ արտահերթ նստաշրջանում:
