Ապագայի բեռնատարները․ ինչպես է «Ավտո Գելլերին» Հայաստանը դարձնում Scania ընտանիքի մի մասը և փոխում խաղի կանոնները

ԵՐԵՎԱՆ, 23 հունիսի․ /ԱՌԿԱ/․ Բեռնատար ավտոմեքենաների և ավտոբուսների արտադրության ոլորտում համաշխարհային առաջատարներից մեկի՝ Scania-ի պաշտոնական ներկայացուցչության բացումը կարևոր իրադարձություն դարձավ Հայաստանի տրանսպորտային շուկայի համար։ Սա պարզապես նոր բրենդի հայտնվելը չէ, այլ բեռնափոխադրումների բուն տրամաբանությունը փոխելու հայտ՝ տեխնիկայի մեկանգամյա գնումից անցում կատարելով դեպի երկարաժամկետ սպասարկում, արդյունավետության հաշվարկ և բիզնեսի ուղեկցում ավտոմեքենայի ողջ կենսական ցիկլի ընթացքում։

Հայաստանում Scania-ի պաշտոնական գործընկերն է «Ավտո Գելլերի» ընկերությունը։

«Ավտո Գելլերի»–ն հայաստանյան շուկա է դուրս բերում բիզնեսի նոր մոդել՝ շեշտը դնելով արդյունավետության, կանխատեսելի ինքնարժեքի, սպասարկման և հաճախորդի համար խնայողությունների վրա», - բացման արարողության ժամանակ հայտարարել է ընկերության հիմնադիր և տնօրեն Գևորգ Գևորգյանը՝ պատասխանելով «ԱՌԿԱ» գործակալության հարցերին։

Նրա խոսքով՝ Հայաստանում առաջարկվելու է մոդելային ամբողջական շարքը, երաշխիքային և տեխնիկական սպասարկումը, հատուկ ֆինանսական գործիքներ, ինչպես նաև trade in և buyback համակարգեր։

Մեքենայի վաճառքից դեպի համալիր լուծումների մատակարար

Գևորգյանը նշել է, որ Scania-ի հայտնվելը կարող է փոխել խաղի կանոնները հայաստանյան ծանրաքարշ մեքենաների շուկայում։ Եթե նախկինում տեխնիկա ընտրելիս շատ ընկերություններ առաջին հերթին նայում էին գնին, ապա նոր մոտեցումն առաջարկում է տրանսպորտը գնահատել դրա արդյունավետության միջոցով՝ շահագործման ողջ ժամկետի ընթացքում։

Scania-ի առանցքային առավելությունները, «Ավտո Գելլերի»–ի ղեկավարի խոսքով, երկարակեցությունն են, տեխնիկական սպասարկման համար անհրաժեշտ նվազագույն ժամանակն ու ռեսուրսները, ինչպես նաև ժամանակակից տեխնոլոգիաները։ Հենց այս գործոններն են երկարաժամկետ հեռանկարում բիզնեսին թույլ տալիս նվազեցնել ծախսերը, ավելի ճշգրիտ հաշվարկել փոխադրումների ինքնարժեքը և բարձրացնել արտադրողականությունը։

Նա նշել է, որ «Ավտո Գելլերի»–ն իրեն դիրքավորում է ոչ թե որպես ավտոմեքենաների դասական վաճառող, այլ որպես համալիր լուծումների մատակարար։ Ընկերությունն առաջարկում է հաճախորդներին գործիքներ, որոնք պետք է հեշտացնեն տեխնիկայի շահագործումը՝ ֆինանսավորում, buyback, trade in, սպասարկման ուղեկցում և ծախսերի օպտիմալացման վերաբերյալ խորհրդատվություն։ Այս իմաստով Scania-ի մուտքը Հայաստան կարևոր է ոչ միայն խոշոր փոխադրողների համար։ Այն կարող է ազդել նաև լոգիստիկայի ավելի լայն շուկայի վրա, որտեղ ավելի մեծ նշանակություն են ստանում տեխնիկայի հուսալիությունը, կանխատեսելի ծախսերը և նոր երթուղիներին ու հաճախորդների պահանջներին արագ հարմարվելու կարողությունը։

«Մենք ունենք նաև հատուկ առաջարկ՝ կապված ներկայացուցչության բացման հետ․ առաջիկա 45 օրերի ընթացքում Հայաստանում Scania-ի բոլոր վարորդները հրավիրվում են անվճար տեխզննման։ Դրա ընթացքում մեր մասնագետները, ովքեր ունեն համապատասխան սերտիֆիկատներ և անցել են անհրաժեշտ վերապատրաստում, կստուգեն ձեր ավտոմեքենաների վիճակը, կառաջարկեն լուծումներ և կփորձեն շարունակել աշխատանքը ձեզ հետ՝ հենվելով իրենց պրոֆեսիոնալ հմտությունների վրա», - հայտարարել է Գևորգյանը։

Նա հավելել է, որ առաջիկա 45 օրերի ընթացքում կգործեն նաև հատուկ առաջարկներ ավտոմեքենաներ ձեռք բերելիս՝ 3 տարի կամ 350 հազար կմ անվճար տեխնիկական սպասարկում։

Հայաստանը դարձավ Scania ընտանիքի մի մասը

Արարողության գլխավոր թեմաներից մեկը դարձավ «Scania ընտանիքի» հայեցակարգը։ Բրենդի ընկալմամբ՝ սա փոխաբերական արտահայտություն չէ, այլ հաճախորդի հետ հարաբերությունների կոնկրետ մոդել․ բեռնատարի գնումը դառնում է երկարաժամկետ գործընկերության սկիզբ, որի շրջանակում արտադրողն ու պաշտոնական ներկայացուցիչն ուղեկցում են սեփականատիրոջը մեքենայի ողջ կենսական ցիկլի ընթացքում։

Կենտրոնական Ասիայի տարածաշրջանում Scania-ի խորհրդի նախագահ Ստեֆան Դորսկին նշել է, որ ընկերության համար գործընկերոջ ընտրությունը միշտ ռազմավարական որոշում է։ Scania-ն գործընկերոջն է փոխանցում ոչ միայն բրենդը ներկայացնելու իրավունքը, այլև հեղինակության, սպասարկման և հաճախորդների հանդեպ հոգատարության պատասխանատվությունը։

Ստեֆան Դորսկիի խոսքով՝ Գևորգ Գևորգյանի թիմը հզոր տպավորություն է թողել ներդրումներ անելու, զարգանալու և Հայաստանում բրենդի ստանդարտներին համապատասխանող սպասարկման ենթակառուցվածք ստեղծելու պատրաստակամությամբ։ Նա ընդգծել է, որ Scania-ի և «Ավտո Գելլերի»–ի արժեքները համընկնում են, առաջին հերթին՝ հաճախորդի հանդեպ վերաբերմունքի և սպասարկման որակի հարցում։

Պատասխանելով «ԱՌԿԱ» գործակալության հարցին, թե արդյոք կարելի՞ է պնդել, որ Հայաստանը դարձել է Scania ընտանիքի մի մասը, Ստեֆան Դորսկին դրական պատասխան է տվել․ «100 տոկոսով»։ Միևնույն ժամանակ նա հայտարարել է, որ այս ընտանիքին պատկանելը մեծ պատասխանատվություն է, քանի որ խոսքը ոչ միայն բեռնատարների մատակարարման, այլև պրեմիում դասի սպասարկման տրամադրման մասին է, որը հաճախորդներն ակնկալում են նման մակարդակի բրենդից։

Տնտեսող, հուսալի և անվտանգ վարորդի համար

Այն պատճառների թվում, թե ինչու տրանսպորտային ընկերություններին արժե ընտրել Scania-ն, Ստեֆան Դորսկին առանձնացրել է առաջին հերթին տնտեսողականությունը։ Ցանկացած փոխադրողի համար բեռնատարը բիզնեսի գործիք է, ինչը նշանակում է, որ կարևոր են ոչ միայն տեխնիկական բնութագրերը, այլև այն, թե որքան է տեխնիկան վաստակում և որքան արժե դրա շահագործումը։

Նրա խոսքով՝ Scania-ն առաջարկում է վառելիքի ծախսի լավագույն ցուցանիշներից մեկը, ճանապարհին արդյունավետ աշխատանքի բարձր ժամանակահատված և պարապուրդների մինիմալացում։ Տրանսպորտային օպերատորի համար սա նշանակում է ոչ միայն ծախսերի կրճատում, այլև պայմանագրերի ավելի կայուն կատարում։

Scania-ի ներկայացուցիչը նաև հատուկ ընդգծել է վարորդի անվտանգությունը և հարմարավետությունը։ Ժամանակակից խցիկը, էրգոնոմիկան և աշխատանքային միջավայրը դառնում են կարևոր մրցակցային առավելություն փոխադրողների համար, քանի որ որակավորված վարորդներ ներգրավելն ու պահելը հեշտ չէ։ Լավ տեխնիկան օգնում է ընկերություններին պայքարել շուկայի լավագույն մասնագետների համար։

Ազդակ տնտեսության և ներդրումային միջավայրի համար

Հայաստանի էկոնոմիկայի նախարարի տեղակալ Նարեկ Հովակիմյանը Scania-ի ներկայացուցչության բացումը կարևոր իրադարձություն է անվանել ոչ միայն տրանսպորտային ոլորտի, այլև երկրի տնտեսական զարգացման, ներդրումային միջավայրի և միջազգային գործարար համագործակցության համար։

Նրա խոսքով՝ բարձր հեղինակություն ունեցող միջազգային բրենդի մուտքը շուկա վկայում է Հայաստանի հանդեպ աճող վստահության, նրա ներդրումային գրավչության և բիզնես միջավայրի զարգացման մասին։ Սա նաև ազդակ է օտարերկրյա ընկերություններին այն մասին, որ երկիրը բաց է նոր տեխնոլոգիաների, երկարաժամկետ համագործակցության և ժամանակակից սպասարկման մոդելների համար։

Scania-ի պաշտոնական ներկայությունը, ինչպես նշել է փոխնախարարը, հենց վկայում է տրանսպորտի և սպասարկման ոլորտում դեպի ավելի ժամանակակից ստանդարտների անցման մասին։

Եվրոպական և շվեդական շեշտադրում

Հայաստանում Եվրոպական միության պատվիրակության ղեկավար Վասիլիս Մարագոսը Scania պաշտոնական սպասարկման կենտրոնի բացումը կարևոր փուլ է անվանել «Ավտո Գելլերի»-ի և երկրի տրանսպորտային-լոգիստիկ ենթակառուցվածքի համար։ Նա նշել է, որ առևտրի դիվերսիֆիկացման անհրաժեշտության ֆոնին լոգիստիկայի հարցը դառնում է հայկական բիզնեսի հիմնական մարտահրավերներից մեկը։

Մարագոսի խոսքով՝ փոքր և միջին ընկերություններին անհրաժեշտ են ոչ միայն տրանսպորտային լուծումներ, այլև հասանելիություն միջազգային լավագույն փորձին, որակյալ սպասարկմանը և ժամանակակից տեխնոլոգիաներին։ Scania-ի ներկայությունը հայաստանյան շուկայում կնպաստի տնտեսության մրցունակության բարձրացմանը։

Նա նաև հիշեցրել է, որ «Ավտո Գելլերի»–ն Amber Capital-ի՝ Եվրոպական միության կողմից համաֆինանսավորվող հիմնադրամի հաջողված ներդրումներից մեկն է։ Այս օրինակը, ԵՄ պատվիրակության ղեկավարի գնահատմամբ, ցույց է տալիս, որ ազդեցության ներդրումները (impact investments) և բաժնեմասնակցային ֆինանսավորումը Հայաստանում կարող են արդյունավետ աշխատել և մասնավոր կապիտալ ներգրավել հեռանկարային ուղղություններում։

Հայաստանում Շվեդիայի դեսպան Եվա Սունդկվիստն, իր հերթին, նշել է, որ Scania-ն շվեդական արդյունաբերության վառ խորհրդանիշներից է։ Նրա խոսքով՝ բրենդը մարմնավորում է այն հատկանիշները, որոնց հետ ամբողջ աշխարհում ասոցացվում է Շվեդիան՝ նորարարություն, հուսալիություն, առաջատար տեխնոլոգիաներ, հարմարավետ դիզայն, սպասարկման բարձր մակարդակ և միջազգային ճանաչում։

Նոր նշաձող շուկայի համար

Scania-ի պաշտոնական մուտքը «Ավտո Գելլերի»–ի միջոցով Հայաստանի համար նոր փուլ է բացում կոմերցիոն տրանսպորտի շուկայի զարգացման գործում։ Փոխադրողների համար սա նշանակում է հասանելիություն համաշխարհային մակարդակի տեխնիկային, պաշտոնական սպասարկմանը, հասկանալի ֆինանսական գործիքներին և երկարաժամկետ ուղեկցմանը։

Երկրի տնտեսության համար նախագիծն ունի ավելի լայն իմաստ։ Այն համընկնում է լոգիստիկայի արդիականացման, առևտրի դիվերսիֆիկացման և հայկական բիզնեսի մրցունակության բարձրացման օրակարգի հետ։ Այն պայմաններում, երբ տրանսպորտային ծախսերը, մատակարարումների հուսալիությունը և սպասարկման որակը դառնում են ծայրահեղ կարևոր, նման ներդրումները կարող են նշանակություն ունենալ ավտոմոբիլային շուկայի սահմաններից շատ հեռու։

«Ավտո Գելլերի»–ում ընդգծում են․ Scania-ն Հայաստանում պարզապես նոր բրենդ չէ ընկերության պորտֆելում։ Դա խոստում է՝ լինել հաճախորդի կողքին, օգնել նրան հաշվարկել արդյունավետությունը, նվազեցնել ծախսերը և զարգացնել բիզնեսը՝ հիմնվելով տեխնոլոգիաների ու սպասարկման վրա։ Հենց այդ պատճառով արարողության մասնակիցները խոսում էին ոչ միայն բեռնատարների, այլև Հայաստանի՝ Scania մեծ ընտանիքին միանալու մասին։

«Ավտո Գելլերի» ՓԲԸ-ն հիմնադրվել է 2023 թվականին, կառավարվում է տասնամյա աշխատանքային փորձ ունեցող թիմի կողմից։ «Ավտո Գելլերի»–ն IM Motors և Saic Maxus, ինչպես նաև CATL և Scania բրենդների պաշտոնական ներկայացուցիչն է Հայաստանում։