ՀՀ-ում պարենային ապրանքները հունիսին տարեկան կտրվածքով թանկացել են 8,6%-ով, իսկ մեկ ամսում էժանացել են 1,5%-ով

ԵՐԵՎԱՆ, 6 հուլիսի․/ԱՌԿԱ/․ Պարենային ապրանքների և ոչ ալկոհոլային խմիչքների գները 2026 թ.-ի հունիսին 2025 թ.-ի հունիսի համեմատ աճել են 8,6%-ով, իսկ ընթացիկ տարվա մայիսի համեմատ նվազել են 1,5%-ով։ Այս մասին են վկայում Հայաստանի վիճակագրական կոմիտեի տվյալները։

Հացաբուլկեղենը և ձավարեղենը հունիսին տարեկան կտրվածքով թանկացել են 2,8%-ով, իսկ մեկ ամսում՝ 0,2%-ով։ Ընդ որում, բրինձը նախորդ տարվա հունիսի համեմատ էժանացել է 3,7%-ով, իսկ մայիսի համեմատ՝ 0,7%-ով, ձավարը թանկացել է համապատասխանաբար 10,4%-ով և 0,7%-ով, հնդկաձավարը՝ 9,2%-ով և 0,3%-ով, ալյուրը՝ 2,5%-ով (ամսական 0,1% աճով), հացը՝ համապատասխանաբար 2,2%-ով և 0,3%-ով, մակարոնեղենը՝ 7,2%-ով (ամսական 0,2% նվազմամբ)։

Միևնույն ժամանակ, լոբին տարեկան կտրվածքով էժանացել է 2,8%-ով և 1,3%-ով՝ մեկ ամսում, ոսպը՝ համապատասխանաբար 3,3%-ով և 0,9%-ով, իսկ ոլոռը տարվա կտրվածքով թանկացել է 1,1%-ով և մեկ ամսում էժանացել է 0,3%-ով։

Միսը հունիսին տարվա կտրվածքով թանկացել է 12,5%-ով, իսկ մայիսի համեմատ՝ 0,5%-ով։ Ընդ որում, տավարի միսը տարեկան կտրվածքով թանկացել է 23,4%-ով, իսկ մեկ ամսում՝ 0,7%-ով, խոզի միսը՝ թանկացել է 7,8%-ով և մեկ ամսում՝ 0,2%-ով, ոչխարի և գառան միսը՝ համապատասխանաբար 16,4%-ով և 1,3%-ով, իսկ թռչնամիսը (հավի միս)՝ 5,2%-ով (ամսական դինամիկայի բացակայության պայմաններում)։

Ձկան և ծովամթերքի գները 2026 թվականի հունիսին 2025 թվականի հունիսի համեմատ աճել են 1,3%-ով, իսկ մայիսի համեմատ նվազել են 1,8%-ով։ Ընդ որում, թարմ իշխանը տարեկան կտրվածքով էժանացել է 1,6%-ով, իսկ մեկ ամսում՝ 2,1%-ով։

«Կաթնամթերք, պանիր և ձու» խմբում գները հունիսին տարվա կտրվածքով աճել են 12,5%-ով, իսկ մեկ ամսում նվազել են 0,6%-ով։ Միևնույն ժամանակ, պաստերիզացված կաթը տարեկան կտրվածքով թանկացել է 8,3%-ով (ամսական զրոյական դինամիկայի պայմաններում), թթվասերը՝ թանկացել է 9,3%-ով և մեկ ամսում՝ 0,3%-ով, կաթնաշոռի գներն աճել են 7,4%-ով և մեկ ամսում՝ 0,2%-ով, պանիրը թանկացել է 7,2%-ով (ամսական 0,5% նվազմամբ), իսկ ձուն տարեկան կտրվածքով թանկացել է 29,9%-ով և մեկ ամսում էժանացել է 1,7%-ով։

«Յուղեր և ճարպեր» խմբի ապրանքները տարեկան կտրվածքով թանկացել են 4,6%-ով, իսկ մայիսի համեմատ էժանացել են 1,3%-ով։ Ընդ որում, կարագը թանկացել է 2%-ով, բայց մեկ ամսում նվազել է 3%-ով, իսկ արևածաղկի բուսական յուղը թանկացել է համապատասխանաբար 10,2%-ով և 0,2%-ով։

Մրգերը հունիսին տարվա կտրվածքով թանկացել են 16,8%-ով, իսկ մեկ ամսում՝ 11%-ով։

«Բանջարեղեն» խմբում գները տարեկան կտրվածքով աճել են 3,1%-ով, իսկ մայիսի համեմատ՝ նվազել 15,8%-ով։

«Շաքար, մրգախյուս, մեղր, օշարակներ, շոկոլադ և շաքարային հրուշակեղեն» խմբում հունիսին գների աճը տարեկան կտրվածքով կազմել է 3,4%, իսկ մեկ ամսում արձանագրվել է 0,1% նվազում։ Ընդ որում, շաքարը և շաքարավազը նախորդ տարվա հունիսի համեմատ էժանացել են 0,6%-ով, մեկ ամսում գները չեն փոխվել։ Շոկոլադը տարվա կտրվածքով թանկացել է 4,4%-ով, իսկ մեկ ամսում՝ 0,7%-ով։

«Սուրճ, թեյ և կակաո» խմբում ընթացիկ տարվա հունիսին նախորդ տարվա հունիսի համեմատ գներն աճել են 5,8%-ով, իսկ մայիսի համեմատ՝ նվազել 0,1%-ով։ Սուրճը տարեկան կտրվածքով թանկացել է 5,6%-ով և մեկ ամսում էժանացել 0,1%-ով, իսկ կակաոն համապատասխանաբար թանկացել է 19,3%-ով և էժանացել 0,6%-ով։

Հանքային կամ աղբյուրի, ինչպես նաև շշալցված խմելու ջրի գները հունիսին տարվա կտրվածքով աճել են 3,8%-ով, իսկ մեկ ամսում՝ 0,5%-ով։

Ալկոհոլային արտադրանքից հունիսին օղին տարեկան կտրվածքով թանկացել է 10,7%-ով և մեկ ամսում՝ 0,6%-ով, գինին՝ համապատասխանաբար 1,19%-ով և 0,2%-ով, իսկ գարեջուրը՝ տարվա կտրվածքով 4,8%-ով և մեկ ամսում՝ 0,5%-ով։

Ծխախոտային արտադրատեսակները հունիսին տարեկան կտրվածքով թանկացել են 6,9%-ով, իսկ մեկ ամսում՝ 0,2%-ով։

Այլ խմբերում չներառված սննդամթերքը 2026 թվականի հունիսին 2025 թվականի հունիսի համեմատ թանկացել է 3,5%-ով, իսկ ընթացիկ տարվա մայիսի համեմատ՝ 0,1%-ով։

Միևնույն ժամանակ, ոչ պարենային ապրանքների շուկայում 2026 թ.-ի հունիսին 2025 թ.-ի հունիսի համեմատ գներն աճել են 2,3%-ով, իսկ մայիսի համեմատ նվազել են 0,2%-ով։ Ծառայությունների սակագները տարվա կտրվածքով աճել են 2,4%-ով, իսկ մեկ ամսում՝ 0,4%-ով։

Հայաստանում 2026 թ.-ի հունիսին 2025 թ.-ի հունիսի համեմատ արձանագրվել է 5,1% գնաճ, իսկ ընթացիկ տարվա մայիսի համեմատ գրանցվել է 0,5% գնանկում։