Ադրբեջանական ԶՈՒ-երը «Սմերչ»-ով հրթիռակոծել են Մարտունու շրջանի Ննգի գյուղը. խաղաղ բնակավայրերի ռմբակոխությունները շարունակվում են. ԱՀ ԱԻՊԾ
ԵՐԵՎԱՆ, 27 հոկտեմբերի./ԱՌԿԱ/. Օրվա ընթացքում Ադրբեջանը կրակի տակ է պահել Արցախի խաղաղ բնակավայրերը: Կան տուժածներ, հաղորդում է Արցախի Արտակարգ իրավիճակների պետական ծառայությունը:
Կեսօրին հրետանի է կիրառվել Քաշաթաղի շրջանի Բերձոր քաղաքի վրա, կան բազմաթիվ ավերածություններ:
Հետկեսօրին թշնամին ռազմական ավիացիայով ռմբակոծել է Մարտունի քաղաքը՝ թիրախավորելով քաղաքացիական ենթակառուցվածքներ, հանրային ու տնտեսական նշանակության օբյեկտներ: Մարդկային կորուստներ չկան: Այստեղ ևս նյութական վնասները շատ են:
«Սմերչ» համազարկային կրակի ռեակտիվ համակարգով հրթիռակոծվել է նաև Մարտունու շրջանի Ննգի գյուղը: Կասետային ռումբերի հարվածի հետևանքով երեք կին վիրավորում է ստացել: Ամբողջությամբ ավերվել է մեկ տուն, տարբեր աստիճանի վնաս է հասցվել համայնքի այլ տների ու ենթակառուցվածքների ևս:-0-
