Հրազդանում բացվել է Հայաստանի առաջատար ԱԲ գործարանը․ ծրագրի արժեքը 4 մլրդ դոլար է
ԵՐԵՎԱՆ, 10 օգոստոսի. /ԱՌԿԱ/. Firebird ընկերության արհեստական բանականության (ԱԲ) գործարանի բացումը նշանավորում է ԱԲ զարգացման նոր ու նշանակալի փուլի սկիզբ Հայաստանում, հայտնում է Հայաստանում ԱՄՆ դեսպանությունը։
Հրազդանում Հայաստանի առաջատար հիպերմասշտաբային ԱԲ կենտրոնի բացման արարողությանը ներկա են գտնվել ՀՀ վարչապետ Նիկոլ Փաշինյանը, ԱՄՆ գործերի ժամանակավոր հավատարմատար Դեյվիդ Ալենը և Firebird ընկերության ղեկավարությունը։
4 միլիարդ ԱՄՆ դոլարի այս ներդրումը ենթադրում է առաջադեմ ամերիկյան տեխնոլոգիաների ու ԱԲ ենթակառուցվածքների մուտք Հայաստան։ Սա թույլ կտա երկրին դիրքավորվել որպես տվյալների կենտրոնների, ամպային հաշվարկների և ԱԲ նորարարության տարածաշրջանային կենտրոն։
ԱԲ կենտրոնի բացումը հայ-ամերիկյան աճող գործընկերության ակնառու օրինակ է և գործնական քայլ՝ ի շարունակումն օգոստոսի 8-ի Վաշինգտոնի Խաղաղության գագաթնաժողովի պայմանավորվածությունների։ Այնտեղ ստորագրվել էին ԱՄՆ-Հայաստան երեք կարևորագույն փոխըմբռնման հուշագրեր, որոնցից մեկը վերաբերում էր ԱԲ-ի և կիսահաղորդիչների ոլորտում նորարարական գործընկերությանը։
Ինչպես նկատել է հավատարմատար Ալենը, երբ մեկտեղվում են ամերիկյան և հայկական տաղանդն ու նորարարությունը, բացվում են տնտեսական աճի, տեխնոլոգիական փոխակերպումների ու առավել մեծ բարեկեցության նոր հեռանկարներ։
Նախագծի մասին
Հրազդանում Firebird AI-ֆաբրիկան առաջինն է ԱՊՀ տարածքում, որը ստեղծվել է NVIDIA տեխնոլոգիաների հիման վրա: Կենտրոնի առաջին հարթակը ներառում է 6144 NVIDIA B200 գրաֆիկական պրոցեսոր և ունի 15 ՄՎտ հզորություն:
2025 թվականի հուլիսին մեկնարկային փուլում նախագծի նախնական ներդրումները գնահատվում էին մոտ 500 միլիոն դոլար: Firebird-ը ծրագրում է ենթակառուցվածքի հետագա ընդլայնում. ընկերության ընթացիկ տվյալներով՝ Հայաստանում հաջորդ փուլը նախատեսված է 125 ՄՎտ-ի և նոր սերնդի 75 հազար GPU-ի համար, իսկ համախառն ներդրումները պոտենցիալ կերպով կարող են հասնել շուրջ 5 միլիարդ դոլարի:
NVIDIA-ն ավելի վաղ հայտնել էր, որ մինչև 2027 թվականի վերջը Firebird-ն ակնկալում է Հայաստանում տեղակայել Rubin և Blackwell սերունդների ավելի քան 70 հազար GPU և AI-ենթակառուցվածքի հզորությունը հասցնել մինչև 300 ՄՎտ-ի: Կենտրոնի հաշվարկային հզորությունների առաջին օգտատերերից մեկը դարձել է Perplexity ընկերությունը:
Նախագիծն իրականացվում է Հայաստանի և ԱՄՆ կառավարությունների աջակցությամբ: Օբյեկտի էներգետիկ ենթակառուցվածքն ապահովում է Schneider Electric-ը, հովացման համակարգը՝ Vertiv-ը, իսկ հաշվարկային հզորությունները տեղակայված են Dell PowerEdge սերվերների վրա:
