Հոկտեմբերի 15-ից մինչև դեկտեմբերի 20-ը Հայաստանում վարժական հավաքներ կհայտարարվեն
ԵՐԵՎԱՆ, 26 սեպտեմբերի./ԱՌԿԱ/. Այսօր կառավարության նիստի ժամանակ ընդունվեց որոշում, ըստ որի 2024 թվականի հոկտեմբերի 15-ից մինչև դեկտեմբերի 20-ը ներառյալ Հայաստանում վարժական հավաքներ կհայտարարվեն:
Որոշման մեջ, մասնավորապես, ասվում է.
«Հայտարարել պահեստազորի առաջին խմբի առաջին և երկրորդ կարգերում հաշվառված՝ շարքային, ենթասպայական և սպայական կազմերի պահեստազորայինների վարժական հավաքներ` 2024 թվականի հոկտեմբերի 15-ից մինչև դեկտեմբերի 20-ը ներառյալ»։
Ըստ որոշման՝ վարժական հավաքները հայտարարվում են պահեստազորայինների ռազմական ունակությունների կատարելագործման, մասնագիտական վերապատրաստման և պատրաստման, բարձրագույն կրթություն ունեցող ենթասպայական կազմից պահեստազորի սպաների պատրաստման, մարտական հերթապահության ներգրավման նպատակով։
Նշվում է, որ հայտարարված վարժական հավաքների ընթացքում յուրաքանչյուր քաղաքացի ներգրավվում է ոչ ավելի, քան 25 օրացուցային օր ժամկետով:
